رساله

اخى العزيز /

كل من عندنا يهديك السلام

اهل العزبه جميعا بخير والحمد لله ولا ينقصنا ايتها شىء . والحمد لله

• اعرفك ان ابوك بخير بعد ان تم فصله من العمل فى المصنع . وبيزعل لما يسمع حد بيقول عليه انه اتفصل

هو مصمم انه معاش مبكر واحنا بنحاول نكمل اجراءات صرف معاشه ودايخين السبع دوخات ومش باين له معاش

• اما بخصوص اخوك الصغنن اسم النبى حارسه . فهو بالف خير بس كان تعب شويه الاسبوع اللى فات وراح الوحده الصحيه العمومى الكبيره بتاعت العزبه. اوم ايه الدكتوروصف حالته انها زايده. الحمد لله لحأناه فى اخر لحظه وعمل العمليه ولما خرج من المستشفى كانت كليته اتسرقت ومش عرفين مين اللى سرقها منه . لكن الدكتور الله يكرمه طمأننا وقال ان اخوك عندوه كليه تانيه بسم الله ماشاء الله مسعد ومبخت من يومه وهو كويس

• اما بخصوص امك فهى بالف الف خير وبتدعى لك كل يوم بس هى امبارح وهى فى طابور العيش . واحد ابن حرام لهفها طوبه فى دماغها بس الحمد لله فضلت واقفه فى الصف زي ما هى وما خرجتش غير بالعشر ترغفه

بتوعها امك شاطره من يومها وما يتخافش عليها

• اما بخصوص ابن عمك فهو بخير والحمد لله هو و مراته واولاده الثلاثه وان شاء الله مرتبه هيزيد علاوه يجيلها كده 15 جنيه فى شهر 7 بس يارب ميبعوش الشركه اللى هو بيشتغل فيها قبل شهر 7 ويضيعو عليه ال15 جنيه العلاوة .

المهم كل اهل العزبه بخير والحمد لله وربنا موسعها علينا ومياه الشرب دخلت بيوت العزبه بس اهل العزبه الطماعين اللى مبيحمدوش ربنا بيقولو ان الميه ريحتها صرف صحى احنا كنا فين وصبحنا فين الحمد لله.

والسلام ختام .

اخيك

صابر